પ્રભુ નમીએ રુડી રીતે,

સુખી કર તું દુખો હર તું
જગત કાજે રચી દુનિયા,
બનાવ્યા તેં ઊંડા દરિયા.
સૂરજ ને ચન્દ્ર ઝગમગિયા,
સુખી કર તું દુખો હર તું.

વૈષ્નવ જન તો તેને રે કહીએ,
જે પીડ પરાઈ જાણે રે.

પરદુઃખે ઉપકાર કરે તોયે,
મન અભિમાન ન આણે રે.
સકળ લોકમાં સહુને વંદે,
નિંદા ન કરે કે ની રે.
વાચ કા મન નિશ્ચલ રાખે,
ધન ધન જનની તેની રે.
સમદ્રષ્ટિને તૃષ્ણા ત્યાગી,
પરસ્ત્રી જેને માત રે.
જિહ્વા થકી અસત્ય ન બોલે,
પરધન નવ ઝાલે હાથ રે.
મોહ માયા  વ્યાપે નહીં જેને,
દ્રઢ વૈરાગ્ય જેના મનમાં રે,
રામ નામ શું તાલી રે લાગી,
સકળ તીરથ તેના તનમાં રે.
વણલોભી ને કપટ રહિત છે,
કામ ક્રોધ નિવાર્યાં રે,
ભણે નરસૈંયો તેનું દરશન કરતાં,
કૂળ ઈકોતેર તાર્યાં રે.
    -નરસિંહ મહેતા.

પ્રભુજીને પડદામાં રાખ મા
         પૂજારી, તારા -
                  આતમને ઓઝલમાં રાખ મા.

વાયુ વીંજાશે ને દીવડો હોલાશે એવી
                  ભીતિ વંટોળિયાની ભાખ મા,

                આડે ઊભો તારો દેહ અડીખમ
                  ભળી જાશે એ તો ખાખમાં
         પૂજારી, તારા -
                  આતમને ઓઝલમાં રાખ મા.

ઊડી ઊડીને આવ્યાં પંખી હિમાળેથી,
                  થાક ભરેલો એની પાંખમાં

સાત સમંદર પાર કર્યા તોયે
                  નથી રે ગુમાન એની આંખમાં
         પૂજારી, તારા -
                  આતમને ઓઝલમાં રાખ મા.

આંખનાં રતન તારા છોને હોલાય
                  છોને હીરા લૂંટાય તારા લાખના
હૈયાનો હીરો તારો નહિ રે લૂંટાય કોઇથી
                  ખોટા હીરાને ખેંચી રાખ મા
         પૂજારી, તારા -
                  આતમને ઓઝલમાં રાખ મા.

         - ઇન્દુલાલ ગાંધી(Indulal Gandhi - Prabhuji ne

વંદન કરીએ શ્રી પ્રભુ તમને,

પહેલું વંદન માતપિતાને,

બીજું વંદન ગુરુજી તમને.

વંદન કરીએ શ્રી પ્રભુ તમને,

ત્રીજું વંદન આદ્યશક્તિને,

ચોથું વંદન ઉમાપતિને.

વંદન કરીએ શ્રી પ્રભુ તમને,

પાંચમું વંદન પુરુષોત્તમને,

આશિષ આપો સર્વ સુખ અમને

વંદન કરીએ શ્રી પ્રભુ તમને,

ભક્તજનોને સુખી કરો છો,

મનના સઘળા મેલ હરો છો.

વંદન કરીએ શ્રી પ્રભુ તમને,

જ્ઞાન હ્રદયમાં આપ ભરો છો,

શાંતિ આપો છો સહુના દિલને.

વંદન કરીએ શ્રી પ્રભુ તમને,

રઘુપતિ રાઘવ રાજારામ,
પતિત પાવન સીતારામ.

સીતારામ સીતારામ,
ભજ પ્યારે તુ સીતારામ.
કૌશલ્યાના પ્યારા રામ,
દશરથના દુલારા રામ.

રઘુપતિ રાઘવ રાજારામ,
પતિત પાવન સીતારામ.
અયોધ્યાન રાજા રામ,
હનુમાજીના વહાલારામ.
લક્ષ્મણજીના સાથી રામ,
ભરતજીના બંધુ રામ.

રઘુપતિ રાઘવ રાજારામ,
પતિત પાવન સીતારામ.
રાત્રે નિદ્રા દિવસે કામ,
ક્યારે ભજશો સીતારામ?
સીતારામ સીતારામ ભજ પ્યારે,
નહીં મનુષ્ય જનમમાં રમવા રે.

પરોઢિયે પંખી જાગીને, ગાતાં મીઠાં તારાં ગાન,
પરોઢિયે મંદિર મસ્જિદમાં, ધરતા લોકો તારું ધ્યાન.

હરતાં ફરતાં કે નિંદરમાં, રાતે દિવસે સાંજ સવાર,
તારો અમને સાથ સદાયે, તું છે સૌનો રક્ષ્ણહાર.
તું ધરતીમાં, તું છે નભમાં, સાગર મહીં વસે છે તું,
ચાંદા સૂરજમાંયે તું છે, ફૂલો માંહી હસે છે તું.
દેવ, બનાવી દુનિયા છે તેં, તારો છે સૌને આધાર,
તું છે સૌનો, સૌ તારાં છે, નમીએ તુજને વારંવાર.

સૌનું કરો કલ્યાણ, દયાળુ પ્રભુ,સૌનું કરો કલ્યાણ.
નર-નારી, પશુ-પક્ષી(૨)જીવ જંતુનું તમામ,

દયાળુ પ્રભુ,સૌનું કરો કલ્યાણ.
જગનાં વાસી સૌ સુખ ભોગવે(૨)આનંદે રહી આઠોં જામ;
દયાળુ પ્રભુ,સૌનું કરો કલ્યાણ.
દુનિયામાં દુકાળ પડે નહીં(૨)લડે નહીં કોઈ ગામ,
સર્વ જગે સુખાકારી વધે ને(૨)વળી વધે ધન ધાન્ય,
દયાળુ પ્રભુ,સૌનું કરો કલ્યાણ.
કોઈ કોઈનું બૂરું ન ઈચ્છે(૨)સૌનું ઈચ્છે સૌ સમાન,
દયાળુ પ્રભુ,સૌનું કરો કલ્યાણ.
પોતે પોતાના ધર્મ પ્રમાણે (૨)સૌ ભજે ભગવાન્,
દયાળુ પ્રભુ,સૌનું કરો કલ્યાણ.

હે જગત્રાતા,વિશ્વ-વિધાતા,હે સુખ-શાંતિ નિકેતન હે,

પિતા,અમે તુજ બાળકો, ચલાવ ઝાલી હાથઃ

કર જોડી સૌ માંગીએ, નિત તારો સંગાથ.

જગમાં સૌ સુખિયાં હજો, સાજાં રાખો સદાયઃ

ભલું થજો સહુ કોઇનું, દુઃખ હજો ન જરાય.

સુણીએ રુડું કાનથી, રૂડું નીરખો નેણ,

હાથે રૂડાં કામ હો, રૂડાં નીસરો વેણ.

અહો નાથ ! ઊભા અમે હાથ જોડી,

કરો રંક સામે કૃપાદ્રષ્ટિ થોડી.

સદા તાપ ને પાપથી તો ઉગારો,

અમે માંગીએ ઈશ ! ઓ પ્રેમ તારો.

કૂડાં દુઃખ કાપી રૂડાં સુખ આપો,

અમારા શિરે નાથજી ! હાથ થાપો.

સુખે જાય આ આજનો દિન સારો,

અમે માંગીએ ઈશ ! ઓ પ્રેમ તારો.

--- ખબરદાર

જીવન જ્યોત જગાવો,  પ્રભુ હે ! જીવન જ્યોત જગાવો.

ટ્ચૂકડી આ આંગળઓમાં ઝાઝું જોર જમાવો,

આ નાનકડા પગને વેગે ભમતાં જગત બતાવો;

અમને રડવડતાં શીખવાડો !.....પ્રભુ હે !

વણદીવે અંધારે જોવા આંખે તેજ ભરાવો;

વણ જહાજે દરિયાને તરવા બળ બાહુમાં આપો;

અમને ઝળહળતાં શીખવાડો !.....પ્રભુ હે !

ઉગતાં અમ મનનાં ફૂલડાંને રસથી સભર અનાવો,

જીવનનાં રંગો ત્યાં ભરવા પીંછી તમારી ચલાવો

અમને મઘમઘતાં શીખવાડો !..... પ્રભ હે !

ઉરની સાંકલડી શેરીના પંથ વિશાળ રચાવો,

હૈયાના ઝરણા નાનાને સાગર જેવું બનાવો,

અમને ગરજતાં શીખવાડો !.....પ્રભુ હે !

અમ જીવનની વાદળી નાની આભ વિષે જ ઉડાવો,

સ્નેહ-શક્તિ-બલિદાન-નીરથી ભરચક ધાર ઝરાવો,

અમને સ્થળ-સ્થળમાં વરસાવો ! પ્રભુ હે !

---સુન્દરમ્

શંભુ ચરણે પડી માંગુ ઘાડી રે ઘડી કષ્ટ કાપો

દયા કરી દર્શન શિવજી દર્શન આપો

તમે ભક્તોનાં દુખ હરનારા શુભ સહુનું સદા કરનારા

હું તો મંદ મતિ તારી અકળ ગતિ કષ્ટ કાપો....દયા કરી

અંગે ભસ્મ સ્મશાનની ચોળી સંગે રાખો સદા ભૂતટોળી

ભાલે તિલક કર્યં કંઠે વિષ ધર્યું અમૃત આપો......દયા કરી

નેતિ નેતિ જ્યાં વેદ વદે છે મારું દિલડું ત્યાં જાવા ચહે છે

સારા જગમાં છે તું વસું તારામાં હું શક્તિ  આપો....દયા કરી

હું તો એકલપંથ પ્રવાસી છતાં આતમ કેમ ઉદાસી

થાક્યો મથી રે મથી કારણ જડતું નથી સમજણ આપો....દયા કરી

આપો દ્રષ્ટિમાં તેજ અનોખું આખી સૃષ્ટિને શિવરૂપ દેખું

મારા મનમાં વસો આવી હૈયે હસો શાંતિ સ્થાપો....દયા કરી

ભોળા મહાદેવ ભવ્દુખ કાપો નિત્ય સેવાનું શુભ ફળ આપો

ટાળો માન મદ ગાળો ગર્વ સદા ભક્તિ આપો...દયા કરી

કંઠે લટકે છે રુદ્રાક્ષની માળા કંઠે લટકે છે ભોરીંગ કાળા

તમે ઉમિયાપતિ અમને આપો મતિ કષ્ટ કાપો....દયા કરી

શંભુ ચરણે પડી માંગુ ઘાડી રે ઘડી કષ્ટ કાપો

દયા કરી દર્શન શિવજી દર્શન આપો

આનંદમયી ચૈતન્યમયી સત્યમયી પરમે

તવ મહામુદાનાં ધામ ત્યહીં

અમ અલ્પમુદાનાં ધામ-ઠામ મુકામ અહીં

તવ પરમ હર્ષનાં સાગર કેરી છોળ

અમ ક્લેશ દુખનાં ઘોર અહીં વંટોળ

તું આવ લઈ તું આવ લઈ તું આવ લઈ

તવ ધસમસ નંદ પ્રચંડ તણા રસપૂર

તું આવ અહો તું આવ અહો ત આવ અહો...ઓ.....આનંદમયી....

ચૈતન્યમયી ચૈતન્યમયી ચૈતન્યમયી

તવ ઉર્ધ્વ ચિતીનાં ગગન ત્યહીં

અમ ચિતી ધરાનાં તમસ ઘોરમાં મગન અહીં

તવ પ્રખર તેજનાં દિશ દિશ ભરતાં નીર

અમ મન મનનાં આ પંક મલિન સહુ તીર

તું આવ લઈ તું આવ લઈ તું આવ લઈ

તવ છલછલ ચેતન તણા સભર ભંડાર

તું આવ અહો તું આવ અહો ત આવ અહો...ઓ.....આનંદમયી....

સત્યમયી સત્યમયી સત્યમયી

તવ સ્વર્ણ જ્યોતિની સૃષ્ટિ ત્યહીં

અમ તમસ છાયી લઘુ દ્રષ્ટિ અહીં

તવ પ્રખર તેજનાં ઝળહળતા રવિરાજ

અમ ટમટમ દીપક દીન તણા અહીં કાજ

તું આવ લઈ તું આવ લઈ તું આવ લઈ

તવ ઉજ્જ્વળ ઝળહળ ભર્ગ તણા અંબાર

તું આવ અહો તું આવ અહો ત આવ અહો...ઓ.....આનંદમયી....

પરમે પરમે પરમે

તવ સૃષ્ટિ પારનાં પવન ત્યહીં

અમ ભૂમિ જડિત સહુ ક્રમણ અહીં

તવ સૃષ્ટિ સર્વને ક્રમી જતા નિત નૂતનતમ સંચાર

અમ ડગમગ પડતાં કદમોનો આ શોક મોહ સંસાર

તું આવ લઈ તું આવ લઈ તું આવ લઈ

તવ દિવ્ય જગતનાં ભવ્ય મધુર ઝંકાર

તું આવ અહો તું આવ અહો ત આવ અહો...ઓ.....

આનંદમયી ચૈતન્યમયી સત્યમયી પરમે

--સુંદરમ

તું હ્રદયે વસનારી

ઘટઘટ ભીતર નર્તનહારી....તું હ્રદયે વસનારી

તું અંતરનાં તાર પરસતી અંગુલિકો રઢિયાળી

તું તિમિરોનાં ધણ વાળી  લઈ કરત સદા રખવાળી...તું હ્રદયે વસનારી

તું માનસ અમ મુકુલિત કરતી ઉજ્જ્વળ કો દ્યુતિ અરુણા

તું જીવનનાં વ્રણ પર વરસત કોઈ અમીમય કરુણા.....તું હ્રદયે વસનારી

તું જીવન્ ની જન્મક્ષણોની ધાત્રી પ્રાણ પ્રદીપા

તું કદમે કદમે પ્રજ્વલતી અગ્નિજ્યોત સજીવા.....તું હ્રદયે વસનારી

તું નયનો પર પડદા ઢાળી અન્ય નયન દેનારી

તું જગમાં જગ પાર અનંતે અમ સંગે ઘૂમનારી.....તું હ્રદયે વસનારી

તું આનંદ અનર્ગળ પ્રભુનો તું પ્રભુની પરશક્તિ

તું ઋતસત સૌ ધારણહારી તું અંતિમ અમ મુક્તિ....તું હ્રદયે વસનારી

તું અમ ચરણોની ગતિ તું અમ નેત્ર તણી ધ્રુવ તારા

તવ હ્રદયે અમ વાસ સદા હો હે હરિની રસધારા.....તું હ્રદયે વસનારી

મૈત્રીભાવનું પવિત્ર ઝરણું મુજ હૈયામાં વહ્યા કરે

શુભ થાઓ આ સકળ વિશ્વનું એવી ભાવના નિત્ય રહે

ગુણથી ભરેલા ગુણીજન દેખી હૈયું મારું નૃત્ય કરે

એ સંતોનાં ચરણકમળમાં મુજ જીવનનું અર્ઘ્ય રહે

દીન ક્રુરને ધર્મ વિહોણા દેખી દિલમાં દર્દ રહે

કરુણાભીની આંખોમાંથી અશ્રુનો શુભ સ્રોત વહે

માર્ગ ભૂલેલા જીવન પથિકને માર્ગ ચીંધવા ઉભો રહું

કરે ઉપેક્ષા એ મારગની તોયે સમતા ચિત્ત ધરું

ચન્દ્રપ્રભુની ધર્મભાવના હૈયે સહુ માનવ રાખે

વેરઝેરનાં પાપ ત્યજીને મંગળ ગીતો તે ગાવે

મૈત્રીભાવનું પવિત્ર ઝરણું મુજ હૈયામાં વહ્યા કરે

શુભ થાઓ આ સકળ વિશ્વનું એવી ભાવના નિત્ય રહે.

હે ચન્દ્રમૌલિ,હે ચન્દ્રશેખર

હે શંભો ત્રિલોચન હે સંકટ વિમોચન

હે ત્રિપુરારી અર્ચન

જય જય હે શંકર હે ભસ્માંગ સુંદર

હે પશુપતિ હરિહર.......હે ચન્દ્રમૌલિ

કંઠે ધરી છે તેં સર્પોની માળા,

 ને તવ તાંડવે બાજે ડમરૂ નિરાળા

તેં શૈલરાજે કીધું રે દ્રઢાસન

ત્રિનેત્રે કીધું રતિ પતિનું વિસર્જન.....હે ચન્રમૌલિ

પ્રભો વિશ્વકાજે તેં શીરગંગાધારી,

ને પર્વતદુહિતાની પુજા સ્વીકારી

જગમંગલાર્થે તેં અસુરો સંહાર્યા

ને પીને હળાહળ તેં પથ કંઈ ઉજાળ્યા...હે ચન્દ્રમૌલિ, હે ચન્દ્રશેખર

-પ્રદીપ બ્રહ્મભટ્ટ્

જુઓ તેમનો બ્લોગ્----પ્રદીપની કલમે...

મારા અંદરના અંતરમાં બિરાજેલા દેવ હે!

ધરવી શી મારે તમને અંજલિ જો

મારા રુદિયાનાં તારે તારે ગાનો ઝંકારતાં

ધરવી શી ગીતો કેરી અંજલિ જો

મારા નયનોની કીકીમાંના નૂર છો જો

ત્યારે શીદને અંધારે અમને અથડાવા દ્યો છો દેવ્?

ક્યારે અજવાળે અમને પ્રેરશો જો

મારા કર્ણોની શ્રુતિમાંના સૂર છો જો

ત્યારે શીદને કોલાહલમાંથી ઉગારી લ્યો ના દેવ?

ક્યારે નીરવમાં હંકારશો જો

મારા મુખની વાણીના રસરુપ છો જો

ત્યારે શીદને આ વૈખરીમાં વીખરાવા દ્યો છો દેવ?

ક્યારે અનાહત નાદે પ્રેરશો જો

મારા મનની નૌકાના તમે ધ્રુવ છો જો

ત્યારે શીદને ભમાવી મારી ભટકાવા દ્યો છો દેવ્?

ક્યારે ગહનમાં સંચારશો જો

આજે પાય્ર પડીને વીનવું પ્રેમથી જો

જાગો જાગો સુતેલા દેવ ગજવો જીવન ઘોર

 આ મંગલ ઘડીએ આવો મહાલતા જો

મારા અંદરના અંતરમાં બીરાજેલા દેવ હે

ધરવી શી મારે તમને અંજલિ જો

પ્રભો અંતરયામી જીવન જીવના દીન શરણા

પિતા,માતા,બંધુ અનુપમ સખા હિત કરણા.

પ્રભા,કીર્તિ, કાન્તિ ધન વિભવ સર્વસ્વ જનના

નમું છું વંદું છું વિમલમુખ સ્વામી જગતના

સહુ અદભુતોમાં તુજ સ્વરૂપ અદભુત નીરખું

મહાજ્યોતિ જેવું નયનશશીને સૂર્ય સરખું

દિશાની ગુફાઓ પૃથવી ઊંડુ આકાશ ભરતો

પ્રભો તે સૌથી યે પર પરમ તું દૂર ઉડતો

પ્રભો તું આદિ છે શુચિ પુરુષ પુરાણ તું જ છે

તું સૃષ્ટિ ધારે છે, સૃજન પ્રલયે નાથ તું જ છે

અમારા ધર્મોનો અહરનિશ ગોપાલ તું જ છે

અપાપી-પાપીનું શિવસદન કલ્યાણ તું જ છે

પિતા છે એકાકી,જડ સકલને ચેતન તણો

ગુરુ છે મોટો છે જનકુલ તણો પૂજ્ય તું ઘણો

ત્રણે લોકે દેવા નથી તુજ સમો અન્ય ન થશે

વિભુરાયા તુંથી અધિક પછી તો કોણ જ હશે?

વસે બ્રહ્માંડોમાં અમ ઉર વિષે વાસ વસતો

તું આઘેમાં આઘે પણ સમીપમાં નિત્ય હસતો

નમું આત્મા ઢાળી નમન લળતી દેહ નમજો

નમું કોટિ વારે વળી પ્રભુ નમસ્કાર જ હજો

--કવિ નાનાલાલ

મંદિર તારું,વિશ્વ રુપાળું,
સુંદર સરજનહારા રે.

પલપલ તારા દરશન થાયે,
દેખે દેખણહારા રે.
નહીં પુજારી નહીં કોઈ દેવા,
નહીં મંદિરને તાળા રે,
વર્ણન કરતાં શોભા તારી,
થાક્યા કવિગણ સારા રે.
મંદિરમાં તું ક્યાં છુપાયો,
શોધે બાળ અધીરાં રે
         -જયંતિલાલ આચાર્ય

અસત્યો માંહેથી, પ્રભુ ! પરમ સત્યે તું લઈ જા;
ઊંડા અંધારેથી, પ્રભુ ! પરમ તેજે તું લઈ જા;-કવિ શ્રી ન્હાનાલાલ

મહા મૃત્યુમાંથી, અમૃત સમીપે નાથ ! લઈ જા.
તું હીણો હું છું તો ,તુજ દરશનાં દાન દઈ જા.
પિતા પેલો આઘે,જગત વીંટતો સાગર વહે,
અને વેગે પાણી ,સકળ નદીના તે ગમ વહે.
વહો એવી રીતે, અમ જીવનની સર્વ ઝરણી,
દયાના પુણ્યોના, તુજ પ્રભુ મહાસાગર ભણી.
થતું જે કાયાથી, ઘડીક ઘડી વાણીથી ઉચરું
કૃતિ ઈંદ્રિયોની, મુજ મન વિષે ભાવ જ સ્મરું.
સ્વભાવે બુદ્ધિથી, શુભ અશુભ જે કાંઈ જ કરું,
ક્ષમા દ્રષ્ટે જો જો, તુજે ચરણમાં નાથજી ધરું.