બાવીસમી સદીના ગુજરાત માટે ગુજરાતી નેટ જગત-5

(ગુજરાતી નેટ જગતના વર્તમાન અને ભવિષ્યની છણાવટ કરતી શ્રેણી) 

સાવધાન! ગુજરાતી બ્લોગર મિત્રો!

ગુજરાતી નેટ જગત ત્વરાપૂર્વક વિસ્તરી રહ્યું છે.

આપના ગુજરાતી બ્લોગ્સ અન્ય મોટી સાઈટ્સની નજરે ચડવા લાગ્યા છે.

કેટલીક સાઈટ્સ તો આપના બ્લોગ્સને પ્રકાશિત કરવા લાગી છે. આપની માવજત પામેલી ગુજરાતી પોસ્ટ્સ અન્ય કોઈ કોપી કરી રહ્યું છે – સંક્ષિપ્તમાં નહીં, પૂર્ણ રૂપે.

આપની જાણ બહાર, આપની સંમતિ વિના, આપની પોસ્ટ વ્યાવસાયિક હેતુથી અન્ય જગ્યાએ કઈ રીતે પ્રકાશિત થાય?

કોઈકને આમાં કશું અજુગતું ન પણ લાગે. કોઈક આ વાતને હસી કાઢશે!

આ નાનકડી, નિર્દોષ જણાતી પ્રવૃત્તિ છે. પણ કાલે તેનાં શું પરિણામો હશે?

હું ટેકનોક્રેટ કે લીગલ એક્સપર્ટ નથી. આ મુદ્દાની ગંભીર અસરો હું પૂરી રીતે સમજી શકતો નથી. તેથી કશો નક્કર અભિપ્રાય કે સલાહ આપવાનો મને અધિકાર નથી.

પરંતુ મને એટલું તો જરૂર જણાય છે કે આ ઈચ્છનીય પ્રવૃત્તિ નથી અને કાલે ઊઠીને તે વકરી જશે!

મારો હેતુ ગુજરાતી નેટ જગતને સજાગ કરવાનો છે.

આજે આ ક્ષુલ્લક જણાતો મુદ્દો છે, કાલે બીજા મુદ્દા ઊઠશે.

ભલે નાનો પ્રશ્ન હોય, પણ આપણે સભાનપણે અવલોકીએ. એક થઈ યોગ્ય કદમ ઊઠાવીએ.

ગુજરાતી નેટ જગત સંગઠિત હશે તો આવા પ્રશ્નો પરત્વે જાગ્રતિ કેળવી શકાશે.

આપણી વાત વર્ડપ્રેસ અને બ્લોગસ્પોટ તો શું, ગુગલને પણ સાંભળવી પડે તેવી તાકાત આપણે કેળવવી પડશે.

મિત્રો! આપણે જાગીશું? આપણે એક થઈશું? આપણે એક રહીશું?

.

આપના ગુજરાતી બ્લોગની ચોરી? સાવધાન! 

. 

ગુજરાતી નેટ જગત વિસ્તરી રહ્યું છે.

આપણે વર્ડપ્રેસ કે અન્યત્ર આપણી પોસ્ટ્સ પ્રકાશિત કરી છીએ.

આપણે મહેનત કરીને આપણી પોસ્ટ્સ લખી છીએ, તૈયાર કરીએ છીએ, પ્રકાશિત કરીએ છીએ.

આજની તારીખમાં આપણા પૈકી ભાગ્યે જ કોઈનો હેતુ વ્યાવસાયિક પ્રકાશનનો છે.

શું આપણી પોસ્ટ્સ કોપી કરીને કોઈ તેને વ્યાવસાયિક ધોરણે પોતાના બ્લોગ્સ પર પ્રકાશિત કરી શકે?

જાગો, ગુજરાતી નેટ જગતના મિત્રો! જાગો!

આપની પોસ્ટ્સ બીજાના બ્લોગ્સ પર વ્યાવસાયિક હેતુથી મૂકાઈ રહી છે.

આપની જાણ બહાર ત્રાહિત વ્યક્તિઓ અંગત લાભ માટે તમારી પોસ્ટ્સનો દુરૂપયોગ કરી રહી છે.

આપની પોસ્ટ્સ બીજી સાઈટ્સ પર પણ વ્યાવસાયિક ધોરણે પ્રકાશિત થઈ રહી છે.

શરૂઆત નાના પાયે, દેખીતી રીતે નિર્દોષ લાગે છે. પણ તે વકરી જશે તો બહુ મોડું થઈ જશે!!! 

સાવધાન થઈ જાઓ! મિત્રો!

આપણે સૌએ જાગી જવાનો સમય આવી ગયો છે.

જાગો! નેટ પર ચાંપતી નજર રાખો!

સર્ચ એંજિન્સ પર નજર રાખો. શોધી કાઢો!

ગુજરાતી નેટ જગત પ્રત્યે આપણી જવાબદારી વધતી જાય છે.

.